O curso de verán ‘As fontes documentais para o estudo do monte en Galicia’ comeza este xoves no Museo Provincial de Lugo

A vicerreitora de Servizos Universitarios do Campus de Lugo, Carme Silva Domínguez, inaugurará este xoves, a partir das 9.30 horas, no Museo Provincial de Lugo, o curso de verán da USC ‘ As fontes documentais para o estudo do monte en Galicia’, un programa dirixido polo profesor da Facultade de Humanidades do campus lugués Gonzalo Francisco Fernández Suárez e no que formalizaron a súa matrícula 25 persoas, que cubriron así as prazas ofertadas.

O director deste curso incluído na programación da Universidade de Verán da USC 2014 e o deputado provincial delegado da área de Cultura e Deportes, Mario Outeiro, acompañarán a Carme Silva na apertura deste programa, que está estruturado en 15 horas lectivas e no que intervirán seis relatores. O profesor do Departamento de Historia I da USC e director deste curso, Gonzalo Francisco Fernández Suárez, abrirá ás 10.00 horas a quenda de relatorios do curso cunha intervención que se desenvolverá baixo o título ‘A documentación catastral sobre os montes da Idade Moderna: a súa tipoloxía e utilidade para o estudo e o traballo no ámbito forestal’. A quenda de relatorios deste programa, que busca dar a coñecer as fontes documentais relacionadas co espazo forestal custodiadas no Museo Provincial de Lugo e no Arquivo Histórico Provincial de Lugo, continuará durante a xornada de mañá e tarde e seguirá o venres.